कल्पनाच मी केली नव्हती..
'शाल्मली..'
तुझा चिकटपणा
तुझा चिवटपणा
तुझा कडवटपणा
याची कधी माहितीच मला
नव्हती..
तुझं नाजुकपण
तुझं देखणेपण
तुझं स्त्रीपण
यापलिकडे मी तुला कल्पिलीच
नव्हती..
तुझा कणखरपणा
तुझा बाणेदारपणा
तुझा करारी बाणा
याची दखल मी कधी घेतलीच
नव्हती..
मोहक पदलालित्यात
येत डौलात
सात पावलात
व्यापून टाकशील संसार, कुवत
तुझी कळलीच नव्हती..
पण झालं...
...ते चांगलंच झालं
नशीबच जणू,
पूर्वजन्मीचं पुण्यच फळा आलं
'वज्रादपि कठोराणी
मृदुनी कुसुमादपि..'
तरीही निर्मळ, वागण्यात
संसारगाडा हाकण्यात
चिंतामुक्त ठेवण्यात
अशी एखादी कोमला सुंदरी
असू शकेल जीवनसाथी,
अशी तुझी ओळख मलाच काय
कुणाला झालीच नसती..
मुंगी होऊन साखर गोळा
केलीस
मक्षिका होत मध आणू
लागलीस
सुरेख संसार करीत राहिलीस
निवड तुझी चुकलीही असेल
माझी निवड चुकली नव्हती..
माझ्या सुखद जीवनाची आखणी देवानंच तर
केली नव्हती...
पद्मनाभ स्नेहप्रभा प्रभाकर हिंगे
पुणे.
दिनांक : २८ जानेवारी २०२३
No comments:
Post a Comment