ऐसी अक्षरे : घेऊ वाचनातून आनंद
"....तेवढी पॉवर आहे त्यांची."
"हो. पण तुमच्याजवळ आहेत म्हणजे? "
"पुढलं तर ऐकाल? "
आता काय सांगावं या विचारात मी पडलो.
"सांगा ना." सासरेबुवा उतावीळ.
"फार ...म्हणजे फारच मोठा चमत्कार आहे! हां, आठवला. सकाळी उशाखाली बघतो तो तर काय? त्यांची लंगोटी. किरमुजी रंगाची. म्हटलं, म्हणजे काकामहाराज खरोखरच जवळ आहेत! मी लंगोटीला नमस्कार केला ..."
थांबून पाहिलं तर सासरेबुवांनी वर पाहून हात जोडलेले.
"धन्य...धन्य! तुमच्यापाशी ती लंगोटी..."
"लंगोटी नाही, प्रसाद म्हणा!"
"... बाळासाहेब, त्या प्रसादाचं दर्शन..."
"कसं शक्य आहे?.. तो प्रसाद मी रोज पँटमध्ये वापरतोय!सासरेबुवांनी च्यायला खाली वाकून मला नमस्कार केला!
खुदुखुदु हसू फुटत होतं, तसं आमची 'मंडळी' आमच्याकडे प्रश्नार्थक डोळ्यांनी ह्यांनी काय एवढं इनोदी वाचलं म्हणून पाहात होत्या! आम्ही शं.ना.नवरे लिखित पर्वणी कथासंग्रहातील पर्वणी ही कथा वाचत होतो.
शन्ना, एक मिश्किल, हसतमुख देखणं आणि प्रसन्न व्यक्तिमत्व. ऐसी अक्षरेचे जानी दोस्त! हो, कारण त्यांच्या कित्येक चटपटीत कथा-लेखनाने ऐसी अक्षरेची मान उंचावलीये.
नाटककार, लेखक, पटकथाकार शन्ना..ऐसी अक्षरेचे फँन.. हो, फँनच होते.
भारताच्या साठाव्या स्वातंत्र्यदिनानिमित्त ऑगस्ट २००६ मध्ये काढलेल्या ऐसी अक्षरेच्या विशेषांकाच्या प्रकाशनासाठी आमच्या विनंतीला मान देऊन शन्ना 'भरपावसांत' (त्यांच्याच मिश्किल शब्दांत) आवर्जून आले होते. आपल्या खुसखुशीत मनोगतात शन्नांनी पै(व्हीआयपी) पाहुणा (सामान्य अतिथी), अठरा विश्वे दारिद्र्य (म्हणजे वर्षभर सतत दारिद्र्य), विठ्ठलाच्या आरतीतले 'दर्शन हेळामात्रे' (क्षणमात्रे) अशा शब्दांचे अर्थ उलगडून सांगितले होते. गणपतीच्या आरतीमधील, 'कंठी झळके माळ मुक्ताफळांची' या ओळीतील मुक्ताफळे म्हणजे, जसे, काही वर्ण ओष्ठव्य, तालव्य, दंतव्य तसे कंठातून आणि काही मोत्यासमान दिसणाऱ्या दातांतून जन्म घेतात, इथे 'मुक्ताफळे' म्हणजे 'तोंडाचे शब्द' असा अर्थ शन्नांनी समजावून सांगितला होता.
शन्ना उत्कृष्ट नाटककार, पटकथालेखक, कादंबरीकार होते. त्यांचे अनेक कथासंग्रह लोकप्रिय झाले. शन्नांनी वर्तमानपत्रांमध्ये केलेले स्तंभलेखन खुसखुशीत असायचे.
शन्नांच्या पर्वणी या कथासंग्रहात विनोदी, मिश्किल अशा वेगवेगळ्या ढंगाच्या कथा आहेत. दोनचार उदाहरणं देतो. पर्वणी या पहिल्याच कथेत, 'महाराज' नावाच्या ढोंगावर, थोतांडावर शन्नांनी मजेशीर जोडे हाणले आहेत. 'गालबोट' मध्ये नवराबायकोच्या तीस वर्षाच्या संसारानंतर उभयतांच्या मनातलं किल्मिष हळुवारपणे शब्दबद्ध केलंय. 'आईस्क्रीम' कथेतला गोपीनाथ उर्फ गोपीचंद याचा वारंवार होणारा प्रेमभंग गंमतीशीर पद्धतीनं कथन केलाय. तर 'बोलनगरी' ही कथा व्हेंट्रीलॉक्विस्ट या कलेवरील आहे. व्हेंट्रीलॉक्विस्ट म्हणजे शब्दभ्रम किंवा जुन्या मराठीत गारुडीवाणी.
शन्नांचं सर्वच साहित्य वाचकाला आनंद देणारं आहे. मिळेल ते, मिळेल तेव्हा जरूर वाचा. हे तर आम्ही तुम्हांला नेहमीच सांगतो.
आता लॉकडाऊन उठला असता तर बरं झालं असतं, असं आपल्या साऱ्यांनाच वाटत होतं. पण शासनानं दोन आठवडे लॉकडाऊन वाढवला. जाऊ द्या झालं. ठेविले कोरोनाने घरांत बंदिस्त। चित्तीं राहुनी घरी समाधानी, वाढवू स्वतःवरी भिस्त .. नाही जमलं ना? पण असु देत, नाही खोडत. लिहिणाऱ्याला नीट जमलं नाही, आणि काय, ते हे, एवढं तरी तुमच्या लक्षात राहील! पर्वणी मधली 'आईस्क्रीम' वाचा, म्हणजे हसाल.. स्वतःवरही ...!
बेलवलकर गृहनिर्माण
३ मे २०२०
No comments:
Post a Comment