ऐसी अक्षरे : घेऊ वाचनातून आनंद
अनेक पांढरपेशी व्यक्ती आपल्या व्यावसायिक जीवनात उदंड पैसे साठवून ठेवतात. इथं बचत, तिथं मुदत ठेवी, विमा, शेअर्स, मुच्युअल फंड, पेन्शन फंड इत्यादी इत्यादीमध्ये गुंतवणूक करतात. का? तर, भविष्याची चिंता! करोत बापडे!
काळजी करु नका, आज या पुस्तक चर्चेत गुंतवणूकविशेष हे सदर नाही, कोणतेही या विषयातले अर्थगुंतवणुकीचे पुस्तक आम्ही सुचविणार नाही.
आर्थिक गुंतवणूक करु इच्छिणाऱ्यांना स्वतःलाच पैसे कुठे गुंतवावेत याचा शोध घेता येतो. त्यांना हा असा सल्ला देण्याची काहीच गरज नाही, हे स्वानुभवावरून आम्ही सांगतो. आम्ही मात्र भविष्यकालीन गुंतवणूक उत्तमोत्तम ग्रंथखरेदीत करून ठेवली आहे, यात नित्य भर पडतच असते.
एक सल्ला मात्र आम्ही विनामूल्य देऊ इच्छितो. दैनंदिन जीवनात मिळणाऱ्या मोकळ्या वेळेत काय वाचावं? कोणती पुस्तकं आज विकत घेऊन ठेवावीत? कोणत्या पुस्तकात आपल्याला साठवून ठेवता येईल असे विचारधन मिळेल? वाचनसंस्कृती कशी जतन करता येईल? आपल्या मुलाबाळांवर कोणत्या पुस्तकांच्या वाचनाने उत्तम संस्कार होतील ? यादी मोठी आहे. हे विचारधन अमूल्य आहे. त्याची किंमत करणं अवघड आहे, म्हणून सल्ला विनामूल्य.
तुम्हांला म्हणून सांगतो, मोकळ्या वेळेत आम्ही ग्रंथविक्री भांडारात जाण्याची सवय लावून घेतली, त्याचं मधुर फळ आज या लॉकडाऊनच्या काळात आम्हाला चाखता येतंय.
आमच्या कुवतीनुसार पुस्तकपेढीइतकी खूप जरी नाही, तरी बरीच पुस्तकसंपदा गाठीशी असल्याचं समाधान आहे. या पुस्तकसंपत्तीमुळे अनेक भावनांचा रसास्वाद घेत आयुष्य अधिकाधिक समृद्ध करण्याची संजीवनी आम्हांला मिळाली आहे. एखाद्या उदासवेळी, अशी वेळ येतच नाही, कारण वाचनानं आम्हांला कायम उत्साही ठेवण्याची शक्ती दिली आहे; तरी पण, एखाद्या हृदय पिळवटून टाकणाऱ्या कथाकादंबरीच्या वाचनानं आम्हाला डोळ्यांतल्या अश्रूंना वाट करून देता येणं शक्य होतं.
खळखळून हसणं ही आमच्या कार्यालयातल्या जॉलीवूड संघटनेची मुख्य अट. कारण आम्ही सारे उत्तम विनोदी पुस्तकंवाचनप्रेमी आहोतच. गंभीर, सकस अभिवाचन हे आमच्या वाचनधर्मातलं एक महत्वाचं धर्मतत्व आहे.
असो. हे सांगायचं कारण म्हणजे, पुस्तककपाट उघडलं की, आज काय वाचायचा मूड आहे त्यावरून आपोआपच बोटं पुस्तकं निवडतात.
आज निवडलेलं पुस्तक आहे, सुप्रसिद्ध कवयित्री आणि कथालेखिका, नीरजा लिखित चिंतन-शलाका
ऐसी अक्षरेचा वृत्तपत्रातील साहित्य या विशेषांकासाठी आम्ही जेव्हा उत्तम साहित्याच्या शोधात होतो, त्यावेळी हे पुस्तक आम्हांला मिळाले. लोकसत्ता या प्रमुख आणि प्रसिद्ध वृत्तपत्रातल्या साहित्य संस्कृती या सदरात दोन हजार एक च्या दरम्यान प्रकाशित झालेले ४२ लेख या ललित लेख संग्रहात आहेत.
लोकसत्तामधील अनेक साहित्यिक सदरे वाचनीय आणि संग्रहणीय असतात. अनेक मान्यवर साहित्यिक या वृत्तपत्रासाठी लिहितात.
चिंतन-शलाका या पुस्तकात नीरजा यांनी विविध विषयांवर आपले विचार मांडले आहेत.
विसाव्या शतकातल्या मराठीतल्या समृद्ध साहित्याच्या वारश्याचा परामर्श घेत लेखिकेनं नव्या सहस्रकातल्या नव्या जबाबदारीची जाणीव करून दिली आहे, ' गेल्या सहस्रकानं दिलेला समृद्ध वारसा घेऊनच आपल्याला पुढं जायचं आहे. या नवीन सहस्रकावर आपल्या नावाचा ठसा उमटवायचा आहे. अशा वेळी आज सर्व सृजनशील लेखककवींवर एक मोठी जबाबदारी आली आहे असं मला वाटतं. ही जबाबदारी साधीसुधी नाही.'
सारेच लेख वाचनीय, चिंतनीय आहेत. वृत्तपत्रातील सदरात असल्याने लेखाला शब्दसंख्येचं बंधन असतं. त्या चौकटीत राहून आपले विचार नेमके मांडण्याचा लेखिकेने चांगला प्रयत्न केला आहे.
उठेल हो लवकरच लॉकडाऊन. गाडी मूळपदावर यायला वेळ लागेल. तोवर जे चांगले हाती येईल त्या साहित्याचे जरूर वाचन करा. वाचन संस्कार वाया जात नाहीत.
आज रविवार आहे. पुढच्या रविवार पर्यंत परिस्थितीत पुष्कळ सुधारणा होईल अशी आशा व्यक्त करु या आणि मे सतरा नंतर खतरा दूर होत जाईल अशी अपेक्षा ठेवू या. तोवर,
हम भी है, तुम भी हो,
दोनों है .....
अपनेही घरोंमें ...
बेलवलकर गृहनिर्माण
१० मे २०२०
No comments:
Post a Comment